Ruth L Hrangchal Pa LALHMINGTHANGA Vuina

LALHMINGTHANGA chutia a thih ve tak si-ah chuan amah uina thu sawi ve a ṭul.
June ni 9, 1940 a piang
1952-a pawl 3 pass,
1955-a pawl 6 pass,
1960-a matric pass,
1964-a B.A. pass,
M.A. final year zir laia rambuai hnan, a hnua B.T. pass leh hi kan thawhpui, Ruth Hrangchal pa a ni a. A vuina lamah kan kal ve thei hi ka lawm a ni.

Brig. T Sailo kha kan ngaisang em em ṭhin a, a nau chiah (ti mai ila) Lalhmingthanga hi a thachhang dawltu a nih vang leh zirtirtu ka nih vangin phone hmangin ṭum khat chu ka bia a. Phone-ah chauh, ṭum khat chiah ka be ve hman a ni.

Kum 1980 bawr vel kha a ni ang, PC party sawtkar lai a ni a. MLA te kha kan khuaah an lokal a, kan nu leh pateho hnenah khan engtin nge thu an sawi kan hre ve kilh kelh lo, ka rin dan chuan, “Bairabi-ah Hydel project kan siam ang a, Mizoram khaw tinah kawlphetha hi kan sem chhuak vek dawn a ni. Chumi atan chuan sawrkar hian sum a ngah tawk lo va, nangni thingtlang pate hian electric ban turte in lo ngaihtuah ve thei a ni, in theih phawt chuan in khuaa electric ban turte hi in lo intum ve thei a ni,” an rawn ti a ni maithei.

Kan khua, grouping centre ngat, Chhiahtlangah khan kan pateho kha an phur khawp mai a. Patling za rual zet mai tur kha Iptepui, Chem, chaw fun leh a hmeh (nghathu rawt nge behlawi rep leh sangha rep rawt pawlh, anṭam um nge bekang ro-ka hre vek bik lo) akin an thawk chhuak a.

Chhiahtlang, Sailam Veng paho an hnatlang a, chul rama herhse ril, ngil ṭha tak tak, an va tei a. Motor kawngpuiah an puin an zawn chhuak a, motor kawng aṭang chuan P&E Dept truck ho khan khuaah an rawn phur thleng rum mai a ni. Heta an thawh chhuah hi tun hnu hian ropui ka ti khawp mai. Herhse ril electric ban kha kan khuaah khan kan hmang rei fu a ni. (Nuai 1 sem, nuai 3 sem rilru nen a inang lo viau).

Hetih lai hian Lalhmingthanga chu P&E dept. Minister a ni awm e. Mipui chakna hmang khan hna nasa takin an thawk thei tlat. Tin, mipui rilruah khan sawrkar aṭanga sum leh therhlo beiseina aiin, “Sawrkar hi kan ta a ni a, kan ram tan a nih chuan kan pui thei a ni” tih hi a awm deuh a ni mahna le.

Ṭum khat chu ‘Kar a hla’ tih hla a phuah chhan leh a phuah hun leh hmun, ni leh thla te zawtin phone hmangin ka va bia a, chu chiah chu ka biak ve chhun a ni awm e. He hla hi lengzem hla Mizoten kan neih zingah belhchian dawl leh Mizo hla thu hman dan dik taka hla thu, relevant taka hmanna, Mizo sentiment dik taka hla phuah, lungrun tak a ni. Lalhmingthangan he hla a lo phuah leh, zirlai tana zir tura chhawp chhuah a ni hi thil lawmawm tak a ni. He hla hi kum 1982, Aug. ni 12 a phuah niin min hrilh a. He hla a phuah lai hian a nupui chu Delhi lamah training neiin a thang bo va, an fate lah phai lama lehkha zira an thang bo vek laia a phuah a ni awm e. Patling lungleng hla phuah, mizo ngeih ngawih tak mai hi a thluk siamtu chu Lalsangzuali Sailo a ni.

Pu Lalhmingthanga, RIP