COVID-19 DONA/HMACHHAWN NANA SCHOOL MAWHPHURHNA
(School Annuals Sports 2022 thuziak intihsiaka pakhatna lawman dawngtu C Vanlalhriatpuii, Class-12- B Roll No-2 ziak a ni.)
Corona Virus, COVID-19 tia kan hriat lar hian kum 2019 kum tawp lamah China-a Wuhan Province atanga rawn in tanin khawvel a rawn run tan a. A natna lan chhuahna tlangpui te chu hritlang, khawsik, thawhah leh hrawkna te a ni a. Kum upa lamin an tuar nasa em em a. Kum 2020-ah phei kha chuan ram tam takah mipui maktaduai tam takin nunna an phah a ni. He hri vang hian ram hrang hrangin inkhuahkhirhna dan an siam a, sumdawnna leh hnathawhna hmun tam tak an chawl thup a; hei vang hian ram hrang hram economy pawhin a tlakchhiat phah nasa hle a. Keini India ram kilkhawr ber Mizoram thlengin min chawk buai a ni.
Mizoramah pawh hrileng vang hian hun eng emaw chen chhung zirna in khar vek a ni a. Chuvangin internet hmanga zirtirna kan kalpui te a ngaih hial phah a. Hetiang hian kum 3 dawn chu zirna kalpui hial a ni. Hri lengin zia lam a pan hnu 2020 kum tir lam atangin zirna in te kan hawng chhunzawm leh thei chauh a ni. Kum 4 dawn hri nen kan inchiahpiah hnu chuan mipui lam pawhin a tira kan hlauh ang em emin kan lo hlau tawh bik lo va. Hri leng kara nitin hnathawh dan te pawh kan lo thiam ve tial tial a. Fimkhur taka nun hmun hrang hrangah kan inzirtir bakah inhrilhhriatna (awareness) pawh kan kalpui nasa a, hri vanga nunna chan pawh kan tlem chho ve zel a ni.
COVID-19 do nan hian khawvela sorkar hrang hrang, medical lam mithiam te’n dan leh hrai leh zawm tur (guideline) an siam bakah dan chunga leng tlat in ngai te leh inhrilhhriatna (awareness) lam bengkhawn vak lo te khuahkhirh turin Hridotu pawl COVID task force te an din a. Keini Mizoramah pawh YMA bakah Village level task force te’n COVID lakah indona puangin nasa takin hman an la reng a. Anni ho thawhrimna vang hian kan tawrhna pawh eng emaw chen chu a nep a ni.
Tun 2022 kum laihawl a lo herchhuah meuh chuan kan ram khawpui ber Aizawl-ah pawh hripui kan hlauhna pawh a nep ta hle a. Kan damdawi lam mithiam leh hri dotu pawl (Task force) te’n thurawn leh inkaihhruaina siam te pawh kan bengkhawn lo chho hle tih kan nitin khawsak leh hnathawh chhuahna tang hian a hmuh theih a. Mask vuah leh hand sanitizer hman lamah te kan inthlahdah chho bawk a. Mahse COVID hian min la kiansan mai si lo va, a pawi khawp mai a. Thalai leh hrisel zawk teah chuan he hri hi a thawk na vak lo pawh a ni mai thei a, mah se tar chak lo leh natna benvawn nei mek te tan erawh he hri hi in tura tur phul ang tluk zetin a la hlauhawm si a.
Rei tak inkharkhip kan nih avangin inchhungkhur hi a tua te pawh hian kan khamin kan ning hluah hluah tawh a, hei hi sorkar pawhin hria in inkhar dan a siam leh inkaihhruaina tam tak chu a thlahdul a. Mahse hri hi a la awm reng tho avangin mimal, pawl leh institution hrang hrangte’n hripui a darh zel loh nan leh chak lo zawkte’n an tawrh loh nan inkaihhruaina thar a duang a. Damdawi lam thiam leh chinchang hrang zawk te’n hetiang inkaihhruaina hi buatsaih an nih bawk avangin a kimin a felfai em em zel a ni. Mahse heng inkaihhruaina te hi ziaka dahthat ringawt hi a tawk lo va, zirlai kan nih angin chhiara hriat thiama a taka zawm hi kan mawhphurhna a ni a. A hre lo te hnena inkaihhruaina dan hrilh hriat te pawh hi zilaite hmalakna tur pawimawh em em a ni bawk a ni.
COVID hri hi a reh mai dawn lo va, Vaccine tha zawk an la siamchhuah hma chu zirlai kan nih anga kan zawm ve tur leh mawhphurhna te hi kan hriatchian a tul hle a. COVID laka kan him tlan nana tih harsa lo leh kan hriselna tan pawh tha em em, chhuahvahnaa mask vuah that te, sanitizer hman that te, midang hnaih lutuka lova din leh thut te zawm ngei a tha a. Heng kan tih ve theih tawk te hi school lamah pawh uar taka midang hrilhhriat leh puanzar hi school mawhphurhna a ni. Sikulin a ngaih pawimawh em em chu zirlai nuamsam lo deuh te dinhmun a ngaihven zung zung hi a ni a. Zirlaiin hri a lo kai darh pawhin midang a kaichhawng tur hei hian nasa takin a veng a ni.
COVID-19-in khawvel ram hrang hrang, India rama kilkhawr bera awm arhmai tia lek kan ram, kan pi leh pu tak sakruang zalna, kan chhuan ve em em, mite’n an diriam leh sawichhiat kan hlauh em em ber thlenga hriin nghawng a neih dan leh kan tlem tawhsa nak laia min suat ve dan te hre reng chungin mawhphurhna tihpuitlin harsa lo te te, mash vuah that te, tuilum in te, mahni hriselna ngaihsak, kut silfai that leh midang hnaih lutuka awm loh te hi school leh school naupang te mawhphurhna leh tih ve theih, thahruai leh chakna khawhralna pawh ni lo, kan nitin chin dawklak atana tha leh duhawm em em a ni.
