Integrated Evaluation Scheme (IES) in Mizo

By Govt. Mizo HSS

Internal Examination (IE)

Exam buatsaih nân Sikul Session khat hi term thumah ṭhen tur a ni a. First Term leh Second Term tawpah sikulin subject zawng zawng mark 100 puttirin Internal Examination (Term Exam) an buatsaih a ngaih dawn bakah Term tawp ber (Third Term tiin kan sawi tlangpui)-ah Final exam buatsaih leh tur a ni. Hei hi class-12 bikah chuan Board Exam a ni a, class-11-ah chuan sikulin Final Exam/Annual Exam angin an kalpui thung ang. Subject tina Syllabus te a hun taka zawh a nih theih nân Term tina zawh chin tur thliarfel tur a ni a. Term hrang hrang hun awh dan a hnuaia mi ang hian ruahmanna siam a ni a:

Term Hming	Hun awh
First Term	April-July
Second Term	August-November
Third Term	December-March

Sikul tinin an subject neih zawng zawngah questions an set dan tur Blue-Print leh Design an siam vek tur a ni a. Zirlaite’n Term end (Term tawp) Exam an hmachhawn kim thlap theih nan Zirtirtu incharge te’n ruahmanna felfai tak an siam tur a ni. Damlohna emaw harsatna dang vanga zirlaiin exam a hmachhawn theih loh pawhin exam pangai zawh fel hnuah a exam theihna turin ruahmanna siamsak ni se a ṭha ang. Question pawh blue print/design awmsa zul zuia a hrang hlaka set tur a ni ang.

Term-End exam bakah hian a remchan danin sikulin class test vawi engemaw zat an nei thei ang. Hei hian zirlaite-ah lehkha zir nuam tihna a tuh ang a, teacher te puihnain an hnufualna subject-a an insiamthat theih nan leh an chaklohna lai an inhriat theih nan tangkai hle tura ngaih a ni bawk. Maherawh chu, class-test hi Formative Assessment (Zirlai thiamna hriat nghal theihna tur endikna) hmanrua a nih angin Internal Mark-ah chhiar tel tur a ni lo va. Term tawp zela an mark te chauh Internal Exam mark-ah dah tur a ni ang. Internal mark hi First Term leh Second Term mark aṭanga a ṭha zawk zawk lâk tur a nih rualin zirlaiin Term-end exam hi vawi hnih a hmachhawn ngei tur a ni bawk.

Entirnan, First Term leh Second Term-ah zirlaiin subject pakhat-ah 91 leh 85 lo hmu ve ve ta se, First term-a mark hmuh zawk  hi a tam zawk avangin Internal mark-ah hman tur a ni ang. A IE (Internal Exam-a) final score pawh a hnuaia mi ang hian chawh tur a ni ang:

\( \frac {First \ Term \ leh\ Second \ Term \ End \ Exama \  mark \ tha \ zawk \ zawk}{Term \ End \ Exama \ fullmark}×5 \)

i.e., \( \frac {91}{100}×5=4.55 \)

Ti hian entirnaa kan hman zirlai chuan Internal mark-ah  a hmu tihna a ni.

Assignment/Project/Practical (AP):

Home work leh class-work bakah subject zawng zawng tan First term leh Second chhung hian assignment vawi khat ṭheuh neihtir tur a ni a. Assignments leh Project work inpêk hi mahnia inzir hlutna tuh nân a ṭha hle a. Home work leh class-work kan inpêk ṭhin ang lo takin Assignment/Project-ah hi chuan zirlaite’n an kutzal ngeia tih ngai leh ngaituahna sen ngai leh chhui ngai te a awm theih avangin hei hian nasa takin zirlai rilru-ah research lam tuina a tuh thei a ni. Subject azirin Assignment/project kan intûk dan pawh a dang thei viau ang a. Language subject lamah chuan thuziak/hlaphuah/thawnthu bu thlirzauna leh fakselna (review) tih tura inpêk te hi entirna ṭha tak a ni thei ang.

Zirlai nena kalkawp bik project Arts/Humanity Subjects kan tih mai heng Geography, History, Economics-ah te hian pâk theih a ni a. Hetiang project angah hi chuan thil tam tak a leng thei a ni. India leh ramdang inlaichinna chungchang zirna te, tunlai mipui mimir sukthlek leh awn lam leh a nghawng te, inthlanna kaihhnawih thil te, ram hrang hrang kalphung te, thingtlang lama lo neih leh huan enkawl dan te, veng leh khaw hrang hranga mithi an invui dan te, Mizo khawtlanga NGOs te chanvo te, pawl hrang hrang leh an hnathawh te, kan state-a party hrang hrang hmalâkna leh policy te, Mizoram chhunga innghirnghona hrang hrang lo awm tawh te leh 1966-a MNF helna te, Mizo khawtlang leh a hnambil ang pawha kan nunphung leh chin dan inthlâk chhoh dan te, naupang hmasawn dan (child development) zirchianna leh report siam te, Counselling centre leh an hnathawh te, Mipui incheina leh ngaihlutna inthlâk dan te, kan ram chhung bika sakhuanna leh eizawnna lam inkaihhnawih dan zirchianna te, ADC (Autonomous District Council) inrelbawlna leh hnathawh te, etc. a dang pawh a la tam thei ang.

Economics leh Commerce Subject bikah chuan zirchian tura an lâkkhawm sa data (secondary data) zirchianna leh chhuina te, sumdawnna kalpui theih ve mai ang chi leh a enkawl dan te, sum vawn dan hrang hrang (Accounting systems) leh sum dinhmun leh hlawkna chawhchhuah (final account)  dan siam te etc. project atan hian a hman theih a ni ang.

Tlawhchhuah (field visit) te pawh Arts/Commerce lamah hian ruahman theih a ni a, zirlai te’n an thil hmuh leh hriat aṭangin report an siam thei ang.

Mathematics leh Business Mathematics zirlai te tan chuan kan nitin thiltihnaa ṭangkai chhiarkawp a taka hmanchhuah te, chhiarkawp symbol hrang hrang ,  awmzia leh zirlaibu chhunga mi kher ni lo a hmanna zirchianna project pêk te a ṭha hle ang.

A chunga kan tarlan te hi Assignment leh Project-a kan inpêk theih zauzia entirna mai a ni a. Chhum lo chat lo va naupang te an inzir reng theih nân leh tihtur an neih reng theih nân an tihtur thupui (topics) thlan kawngah zirtirtute’n mawhphurhna sang tak an nei a ni. Assignment leh Projects tihtur kan inpêkin a hrang ṭheuhva zirlai te hi pêk a tur a ni a, an syllabus huam chhunga mi zel thlan tur a ni bawk.

MBSE-in Higher Secondary Curriculum a buatsaihah khan Activities leh Projects rawt (suggest) a nei nual a. Hengte hi Evaluation kan kalpui nâna ṭangkai taka hman theih a ni ang. Curriculumn-a discussion (sawihona), debates (thupui neia inhnialna) leh seminar (zirhona) topic hrang hrang, subject hrang hrang mila a rawt te hi hman ṭangkai a ṭha hle ang.

Practical nei subject-ah chuan Practical hi neihtir char char tur a ni a. Term tina practical neihzat tur Curriculumn-in a tarlan hmun thum ṭhena hmun khat tal hi zo tura beisei kan ni. Student-in practical recordna (note book) a vawng ngei ngei tur a ni a, a khat tawkin zirtirtu hnenah a submit-in a check-tir ṭhin tur a ni. Practical neih tawh zawng zawnga chawhruala zirlaiin mark a hmuh zat (average score from all practicals held) kha practical mark atana hman tur a ni.

CALCULATION OF MARKS
STUDENT PERFORMANCE CARD FOR INTERNAL ASSESSMENT
(SINGLE SUBJECT)

[ MIZO SUBJECT ]

RNo	Name	IE1	IE2	IE (a)	Assignment/Project/ Practical (b)	Attendance (c)	Total (a+b+c)
25	Awmtea	80	91	4.55	8	4	16.55=17
30	Zuali	82	71	4.10	6.4	5	15.50=16

A chunga kan tarlan hi Mizo subject bika IE Mark chawh dan a ni. IE1 = First Term Exam, IE2 = Second Term Exam. Heta entirnaa kan zirlai hman, Awmtea hian IE1-ah 80 (out of 100) a hmu a, IE2-ah 91 (out of 100) a hmu thung a, IE2-ah  a hmuh ṭhat zawk avangin IE2 aṭang hian 5% a hnuaia mi ang hian kan la dawn a ni.

Assignment-a  mark a hmuh leh attendance-a a mark hmuh hi kan belh leh ang a, tichuan IE Mark Total chu 16.55 kan nei ta a. Mark hi decimal point awm lo tur a nih avangin round off/up a ngai bawk. Kan hmuh ang hian 16.55 chu 17-ah kan round up a ni.

STUDENT PERFORMANCE CARD FOR INTERNAL ASSESSMENT (ALL SUBJECTS)

RNo	Name	Eng	Mizo	EL1	EL2	EL3	Addl.Subj.	Gen.Studies	W.E	H & Phy
1.	Awmtea	18	17	20	18	16		A	B	B
2.	Hruaia	16	15	13	17	12		A	A	A

 English = 1^st Language, Mizo= 2^nd Language, EL1 = Elective 1, EL2= Elective 2

A chunga kan tarlan hi Internal Exam-a subject zawng zawnga zirlai mark hmuh a ni a. Kan tarlan tawh ang khan heta kan Zirlai, Awmtea Mizo mark hmuh 17 lo chhuah dan chu Single Subject report-ah chiang taka tarlan a nih kha. Single Subject leh All Subject report  te hi MBSE-ah thehluh ṭhin a ni a, Report dang MBSE lamah kan thehluh te chu:

Term 1 = First Term Result-a out of 100-a an mark hmuh ang ang.
Term 2 = Second Term Result out of 100-a an mark hmuh ang ang.
Assignment = Assignment report out of 100-a an mark hmuh ang ang.
Final Term = Hei hi Attendance leh Assignment mark lakkhawm a ni thung.

IES English version duh tan DOWNLOAD