VSK & UDISE HMELHRIATNA
July 20, 2022 khan Ministry of Education, Govt of India chuan VSK(Vidya Samiksha Kendra) hi NEP 2020 mellung pawimawh tak pakhat atan an tlangzarh a. VSK an siamna chhan ber chu Samagra Shiksha hnuaia program, activities leh projects hrang hrang te chawp leh chilha (realtime) vil nghal nan a ni a. State tin te kan sikul neih zat milin model hrang hrangah min dah a keini Mizoram pawh Model-II (State sikul 1000-5000 vel nei chin) hnuaiah awmin hman ral nghal (Non-Recurring) atan ₹ 250 lakh an dah a, Recurring tan 50 lakh an dah leh a, a vaiin VSK tan hian ₹ 300 lakh (3 crore) an rawn dah a nih chu. (Source: https://pib.gov.in/PressReleseDetailm.aspx?PRID=1843168®=3&lang=1)
UDISE+ hi enge?
UDISE (Unified District Information System for Education) hi ram pum huapa zirlai data hmunkhata lakkhawm (centralized) nan database software lianpui an siam a ni a. Department of School Education & Literacy (under Ministry of Education, Government of India) te enkawl niin khawvel pum huap pawha zirna lam enkawlna software lian ber ang ngaih a ni bawk. A thil tum ber chu sorkar hriatpui (recognised) te atanga data rintlak leh kimchang tak lakkhawm a ni. Heng an data lakkhawm hmanga sorkar hmalak dan tur ruahmanna siam (planning) te, policy siam leh sum leh pai mamawh ruahman te a ni.
Enge VSK hi?
VSK hi state anga zirlai data lakkhawmna (centralized) portal a ni ve thung. VSK-a Daily Monitoring metrics, zirlai leh zirtirtu attendance bakah Monthly Metrics dang te pawh hi phailamah programmatically-a thawn thlak zel an ni, tiin VSK lam hotute chuan an sawi bawk a. Zirlai data hrang hrang sikulte’n kan thun hi min zirchian nan hman a ni dawn a. Kawng leh lamah chuan sikul lam tan phurrit tak mai a ni. Data te hi kan indaihlohna te, kan tlakchham te, kan performance hrang hrang leh dropout kan neih dan te, Pass leh fail pun dan te, naupang sikul bang mai tur kan hum dan te (Retention), CWSN enrollment bakah hmeichhe naupang enrollment zat leh zirlai lamah kan hmasawn dan pumpui thlir nan hman an tum a ni. A tawi zawnga sawi chuan sikul hnathawh engkim hi awmhmun atangin min rawn vilpui an tum a ni ber. Nakin lawkah chuan Nu leh pa (parents) lam te pawh zirnaah hian stakeholders pawimawh tak an nih ve avangin an fakselna (feedback) lakna tur leh selna(grievances) an thlenna tur portal/helpdesk eng eng emaw zirlai thlengin an hman tur te pawh NEP thil tum pawimawh tak a nih bawk avangin an la rawn buatsaih chho zel dawn bawk a ni.
NEP 2020 hnuaiah hi chuan zirtirtu te tan chawlhna hun a awm meuh lova. A program tam zawk hi chu Zirtirtu ni ngai miah lo te siam emaw tih mai tur hian zirtirtu te nitin hnathawh Lesson plan buatsaih te, naupang discipline leh activities hrang hrang te hriatthiamna tel miah lo ang mai hian tihtur hi an ti tam a. UDISE-a naupang record leh VSK-a record hi a hrang ve ve a tih a ngai a. Details a chipchiar hle bawk a ni. Nakinah chuan naupang chawhmeh duh zawng thleng te pawh hian lakkhawm a la ngai hial mai thei a ni. Tin data hi thun theih hun leh update theih hun te a awm vek avangin leh a chang chuan hetiang notification hi a hun zawh dawnah te a rawn thleng chauh thin bawk a. Buai a na duh hle.
UDISE-a zirlai data sikul dang atang rawn luh te kan sikula kan lakluh hnu leh keimahnia XI pass te XII-a kan update fel dawn bawr velah VSK lam buaipui a ngai leh thin a. UDISE lama data lakluh leh update hi fel thawkhata an ngaih hnuah Manuala lakluhna te leh Student detail correct leh update-na an hawng leh thin a. Hei hi naupang lungfing lo na na na chuan DOB leh hming te pawh a Lower leh Higher lama an ziah dan a in an loh nuai emaw an aadhaar te an lo ziah dik loh phei chuan buaina a tam duh hle a. Zirlai 100/200 bawr velah chuan a hautak lem lo va, 1000 chinah chuan lu a tihai ve duh hle. Data finalize kan tih theih meuh hi chuan kum tawp lam a lo ni tawh a. Kan final zawh chuan PEN nei lo te chu Central lam atangin PEN an rawn siamsak a. Zirlai Transfer Certificate, Bonafide, ID Card leh Marksheet-a lang thei turin School ERP-ah kan thun leh vek bawk a ni. Finalize hnu pawha data dik lo a la awm thei leh a, chung zirlai te chu College kai thei chin an nih chuan College lamin an lo chingfel ve tawh ang. XII ni tur tan chuan XII an nih kumah siamthat leh theih chauh ang.
UDISE-a aadhaar verified hi a pawimawhna em em chu APAAR ID generate nan a ni. PEN an nei tawh si a, APAAR ID hi neih leh zel hi va buaithlak ve kan ti mai thei a. Mahse APAAR ID hi Student Aadhaar Card chi khat a ni a. PEN hi chu mahni awmna State chhunga zirlai identification number a ni a. APAAR (Automated Permanent Academic Account Registry) ID hi chu a zau zawk a, National level-a zirlai Identification Number a ni ve thung. Tin APAAR ID nei tur hian zirlai khan a nu leh pa phalna a lak a ngai an ti mauh mai a. A tih chian (Confirm) nan Zirlai nu emaw a pa emaw Voter ID/Aadhaar Card, Driving License, PAN Card) a ngai bawk a ni. Higher Secondary leh a hnuai lam zawng hi School Education hnuaia awm kan ni a, rampum huapa zirlai kan nihna Identification Number chu APAAR ID hi a ni. College lamah chuan ABC(Academic Bank of Credit) ID an nei a, zirlai an nih ang a, an result, mark leh kawng hrang hranga an credit kha Saving Bank-a pawisa kan khawl ang hian an khawlkhawm sak a ni.
Tun dinhmunah chuan naupang lamin anmahnia an inbuaipuina theihna emaw an lo khawih ve theihna tur portal leh application engmah a la awm lo va, sikul lam buaipui vek tur a ni.
UDISE-a Aadhaar validation hi data a dik loh chuan a theih loh tawp a. Aadhaar-a kan hming ziah leh Date of Birth ziah te hi engkimah kan hman vek a ngai a. Tin Aadhaar kan hming ziah danah fimkhur leh zual a ngai hle a. Hmingah hian fullstop hman hi thenkhat chuan kan ching hle a. Aadhaar siam lai pawhin a official te pawh hian lo ziah ve mai te an ching bawk a, a tha lo hle a ni. Fullstop hi hming a ni lo va, hawrawp pawh a ni hek lo, punctuation a ni a. Hminga punctuation dah hi official thilah chuan tih loh tawp tur a ni a. Aadhaar validation velah hian fullstop hman theih mah se PAN CARD-ah hian a theih ve miah lo mai a. PAN leh Aadhaar link te tunlai chuan a lo ngai chho ta a, a buaithlak hle a ni. Chuvangin kan hmingah fullstop te a lo awm ve palh a nih chuan Common Service Centre-ah kalin thlaktir tur a ni. Birth Certificate-ah te fullstop hi a lo tel chuan nawhreh dan zawn a tha hle ang. Common Service Centre thenkhat chuan Aadhaar fullstop thlaktir in tum pawhin fullstop hetah pawh a awm lawm tiin an thlaksak duh lo ve thei tho che u tih hria ula.
Zirtirtu leh sikul lamin data update leh tihfel an sawi reng reng hi ngaihven nghal zung zung loh chuan data dik lovin kan kumtluan thei tih hriat a tha hle a. Hmanlaiah kan cheng tawh lo va, Digital age-a kan chen tawh miau avangin data dik lo vang hian buaina tam tak kan nei thei a. Kan eizawnna leh hmun dangah admission kan tih leh zelna turah pawh data a dik loh chuan mi buai lohnaah buai chiamin sum leh tha nasa tak kan seng thei tih hriat a pawimawh hle a ni. Data te hi official a nih tawh chuan chawp leh chilhin Sorkar lam mi chuan an endik zung zung thei bawk si a, data lamah kan duh fir a ngaiin kan fimkhur a ngai tak zet zet a ni. Post pakhat atan a thui ta tep e.
Govt Mizo HSS chuan Zirlai te’n an data an update awlsam nan tiin Zawn Bawm App kan siam a, class whatsapp group lamah ngaihven tur a ni e.
